米遊記

襯住有時間返香港，揾條短短哋又容易行嘅行山路線郊遊。 選擇有幾個， 最後揀咗網上都幾hit 嘅由大棠行去千島湖清景台。12:30由西鐵郎屏站出發， 好彩一去到K66巴士站就有車。 搭到大棠山路下車後就沿著大棠山路往山上行。大棠山路全條都係石屎路， 坡度亦唔大， 所以雖然係上斜， 但都唔算辛苦。其實大棠山路亦係去楓香林賞楓嘅路線， 所以遊人好多。所以我哋去千島湖清景台前， 都去一去楓香林睇下。 可能已經係1月， 過咗盛開時間， 紅葉已經落咗好多， 亦都已經唔太紅。

朗屏B2出口搭K66到大棠山路下車

沿樓梯上或沿馬路上燒烤場

往楓香林方向行

離開楓香林後向千島湖清景台出發，經過伯公坳後去清景台要由石屎平路轉為上山石級。

伯公坳

山路大多已經鋪上石屎梯級，唔難行， 約1km 山路後， 會有路牌指示轉小路往千島湖清景台

千島湖清景台可以望晒成個大欖涌水塘。 水塘水中有一個一個小島， 所以同一般水塘風景係唔同。 景色係靚嘅， 可惜今日天色不太清楚， 所以打咗好大折扣

離開清景台後， 繼續沿著山路行一段約1km 山路後就回到馬路。馬路一邊係可以落山去黃金海岸， 另一邊就要上山，可以去到另一個水塘：黃泥墩水塘。本來計畫路線時一直都諗住係去完清景台後就會去返黃金海岸離開， 但係嗰一刻又想去黃泥墩水塘睇下， 所以就往山上出發。

可能無乜人知有黃泥墩水塘呢個水塘， 所以沿途遊人好少， 好寧靜同舒服，一個小小水塘， 同另一個係元朗嘅水塘：河背水塘，風景差唔多。

又到選擇路線時間，繼續前行可以去行到洪水橋， 折返可以去返原先目的地黃金海岸， 另外亦可以經山路去返起點附近嘅大棠村。最後我地選擇往大棠村搭K66巴士回到元朗市中心。

沿路經過時見到有山火燒過痕跡，想起澳洲山火，導致好多動物死亡及無家可歸。所以要保護郊野，勿留下火種，防止山火發生。

山火燒過痕跡

一片蘆薈田

大棠黃泥墩村巴士站

全程11公里

大約3.5小時(連拍照)