米遊記

遠足記

Leap Day 2月29日天氣好好有藍天白雲，又係行山嘅好日子，我同三家姐同埋其他buddies都想行下d相對少人d嘅路徑，所以就揀咗行愉景灣！兩年前都試過由梅窩行去愉景灣碼頭，而今次我地就由愉景灣寶琳閣側邊小路上山行下老虎頭郊遊徑，而目的地就係落番東涌市中心。

我地先搭地鐵去到欣澳站，然後坐DB03R巴士去到愉景灣嘅海燕徑15號巴士站落車

沿住上畔峰嘅樓梯上，經過寶峰徑去到寶琳閣，前面就有條小路上愉景灣觀景台。呢條小路都有少少比較高嘅梯級，大約行廿分鐘就上到觀景台嘅涼亭，由觀景台可以望到整個愉景灣海灘，Disneyland 等地方！

沿路見到分叉轉右上樓梯繼續向上行

到達觀景台位置之後，向山上望就會見到第一個標高柱

沿路都無咩遮蔭位，勁曬

到達標高柱又係打卡嘅時間⋯⋯

一陣我哋就要上前面個山 ↑↑↑

開始上山的啦，我地望住遠遠斜斜嘅沙石路，睇落有d 難

由愉景灣觀景台行上老虎頭觀景台，就好似由山腳爬上山頂嘅感覺

呢舊石就係老虎頭嘅位置 ↑↑↑ 要上到石上面先會見到老虎頭

行下停下就上頭老虎頭位置！上到老虎頭，景色真係靚，天色清，可以眺望到南丫島，喜靈州，機場，愉景灣高爾夫球場、水塘等等 ↑↑↑↓↓↓

雖然到左老虎頭，但要上到觀景台都仲有一小段路，繼續往山頂進發

中途回望一下，比少少想像力就可以睇到係個老虎頭啦

終於到左觀景台，亦都係休息嘅好地方，見到老虎頭郊遊徑嘅啡色牌，雖然個牌寫住仲有3.4公里，但黎緊嘅路段都係上上落落嘅山路，感覺唔似行緊3.4公里咁少

又有一個標高柱啦

呢段路我覺得易上難落，所以如果相反方向由梅窩或東涌行去愉景灣，落山要好小心！

呢段路中間都有啲怪石，順道坐下休息下 ↑↑↑↓↓↓

彎彎曲曲山路↑↑↑

試劍石↑↑↑

終於叫做落到山，會見到左右兩邊路，一邊去梅窩一邊去白芒，我地就沿右邊落番白芒行番東涌市

落白芒呢條路都係石屎路，比起山路易行好多，沿住呢條奧運徑慢慢去到白芒

由白芒去東涌涌市中心都有大約3公里路

溫馨提示：
呢段山路都要有番咁上下體能，同埋帶枝行山竹會舒服d! 沿路無補給無洗手間，所以一定要帶夠水，沿途亦無咩大樹可以遮陰，所以一定要做足防晒，帶帽太陽眼鏡，亦可以帶少少鹽糖同小食，唔使怕肚餓！

全程：約14公里、約5.5小時（連拍照）

以上純粹個人感受及分享