長沙3日2夜｜必試美食～品味長沙風味
茶顏悅色
長沙必飲～茶顏悅色！講到係奶茶界嘅天花板…
由五一廣場地鐵出口一出，佢就好似7仔咁，緊有一間係左緊！見到好長龍千祈唔好排隊，因為行兩步又有一間！
中國古典風格嘅奶茶店。一飲就飲佢嘅招牌「幽蘭拿鐵」，都試過幾間，覺得每間味道都有少少唔同，不過奶好香滑，加埋啲cream都唔會太甜～係好飲嘅！
我哋連佢個雪糕都食埋，天氣太熱，未行出舖頭門口雪糕都融～［桂花烏龍茶味雪糕］
我覺得佢同霸王茶姬好似，只不過係茶嘅口味有啲唔同！
鴛央咖啡
經朋友推介，長沙除咗要飲「茶顏悅色」之外，仲要試下佢其嘅「鴛央咖啡」
店舖設計用咗中國書法風格，每杯飲品名稱都有主題字命名，用中國嘅茶+巴西or埃塞嘅咖啡豆，中西合璧嘅做法，好有創意！
order咗「事寬則圓」&「慢慢來，比較快」，睇個名係唔會知道係咩嚟，都要睇佢個menu先知係咩！
「事寬則圓」用烏龍茶，咖啡豆揀咗埃塞，杯面仲配有一塊紫菜！店員話：即磨嘅咖啡上面仲飄浮著一層咖啡油脂，可以先試一小啖咖啡嘅焦香味道，最後先攪勻佢！飲落去真係有種煙燻味，唔知點解個紫菜嘅味好濃，相反茶味就唔係好覺。
另一杯「慢慢來，比較快」用紅茶，咖啡豆揀咗巴西，呢杯咖啡味比較濃，加上用堅果奶沖，係我最喜歡嘅口味！
不過兩杯都係用黃油乳，口感係好醇厚，不過卡路里肯定就….😅
「鴛央咖啡」仲有中式雞尾酒，酒+茶+咖啡奶蓋🤔
我就無試到，如果有人試過話我知…
真係～「日咖夜酒」
大山咖啡
長沙天氣實在太熱，立即喺附近搵返間cafe坐吓…
未入門已經有人坐咗喺門口影相！
呢間又係有一啲創意咖啡🤔
開心果～有一層開心果醉在上面，咖啡係偏酸味重
菠蘿康寶藍～菠蘿味十分清新，但咖啡和菠蘿味道是分開的，所以飲到尾只有咖啡味道。
環境舒服，唔會太嘈吵，給我有一種古代私塾的感覺。
地址：開福區永興街22號
五一廣場8號出口
泰興誠
深圳有食過蟹黃撈麵，覺得食完會有啲滯…今次去長沙食小籠包！我哋去到已經過咗食飯時間，無咩人，又有可能係呢間店喺一條巷仔裡面，唔係好起眼 🤷🏻♀️
order咗大蟹黃湯包、金沙蟹粉小籠包和香菇鮮肉小籠包。落完單望住師傅即叫即整。等大約15分鐘左右！
手掌咁大嘅湯包要先用飲管吸湯汁，第一啖要小心熱，蟹肉蟹黃都吸埋出嚟，大滿足，之後就再食埋啲餡！
食完大湯包之後再食金沙蟹粉就會顯得比較普通，不過令我哋最驚喜係個香菇鮮肉，平時唔係咁鍾意食菇嘅我都覺得好食，菇好有鮮味，唔知關唔關食完蟹事呢🤔小籠包啲皮夠薄，一啖咬落去成口湯汁。
地址：芙蓉區定王台街道登隆街62號（登隆街店）
黃興廣場1號出口
公交新村粉店
又嗦粉啦😋
呢間係網上睇到一定要去嘅一間，都真係幾多人！一入去要揀食咩比錢先，之後要自己拎麵。最怕就係要咁急諗食咩，唔駛諗就點佢招牌。不過我見人哋食緊好似好大碗咁，所以叫咗一碗2份食！
好彩叫咗一碗，都真係幾大碗！我哋仲加咗隻蛋！
牛肉雪里紅粉～牛肉夠淋，配料也是自己加，粉似我哋食開嘅河粉但厚身少少。
可能一開始抱有太大期望，其實又未去到好驚艷，不過網紅店點都要試吓，又或者其他粉更好食，而我哋又無食到呢🤷🏻♀️
如果大家食過嘅又覺得點呢🤔
地址：天心區西牌樓街43號 （太平老街店）
五一廣場1號出口
久飄湘
繼續食😋
好多人話去到長沙一定要嗦粉…話是旦入一間都唔會伏😏咁我又即管試吓！因為酒店樓下就有一間食粉嘅！
殺豬粉～睇名就覺得係食豬啦😂
母雞湯底 胡椒去腥
郴州米粉 滑彈入味
豬肉鮮燉 純享美味
粉煮好自己加辣椒、蔥、芫荽同酸豆角。粉配料有豬紅、豬肉，豬紅食落無咩腥味，啲粉食落有啲似米線，但佢又唔係米線，唔會好淋但未去到爽口，唔知用咩形容詞形容，但係食過你係會想再食。
地址：開福區黃興北路112號潤置商業中心五棟103號
培元橋站4號出口
西塔老太太泥爐烤肉
第一次見到呢間烤肉店喺深圳排隊都要等1-2小時（假期）
今日去到長沙見到佢唔駛排隊就入去試吓啦。入到去先發現原來香港有分店，唔知多唔多人排隊呢🤷🏻♀️
美團買咗二人餐¥188.8，有5款肉＋海帶湯和小菜
老太太特色（瘦牛）：佢呢個瘦牛又真係幾好味，食落口腍腍地又有肉汁+燒得岩岩好！點埋呢個麻醬真係👍🏻👍🏻
秘制松板肉：平時好怕食豬頸肉，因為食親都好韌，出乎意料之外呢個係爽㗎😋
牛五花：用生菜泡菜包住一齊食，食落一啲都唔膩…
仲有老太太特色肥瘦和秘制豬排！
海帶湯和小菜
西塔老太太係用碳爐烤肉，所以烤出來的肉會更加香！
最好就係有人燒埋比我哋食，1個服務員大約負責2-3枱，每燒一款肉前都會介紹一吓，會問要唔要熟啲或者要唔要燶啲啲，都幾細心！
如果無咩人排隊嘅話，可以係香港或深圳再encore！
地址：芙蓉區解放西路147號（國金觀光電梯對面）
五一廣場站國金街10號出口
圍湘記
去咗食地道嘅湖南菜啦，怕人多我就無係五一廣場果邊食，搵呢間都算近酒店，由我哋酒店行去大約15分鐘嘅「圍湘記砂鍋湘菜」，去到先知原來係美團嘅上榜餐廳，果刻好驚食飯時間樓上要排隊等位，好彩無咩人姐，無咩人又驚好唔好食😅（咩都要驚一餐）
一坐低服務員就送上西瓜～餐前食生果🤔係長沙係咁樣定係佢呢間係咁呢🤷🏻♀️兩個人Order咗3個餸，都幾大份，應該都食唔哂。
蒜香生燜蝦
Order呢個係因為晏晝食咗個粉絲蝦滑好好味，一見到咁似就立即點！似蒜蓉開邊蝦但係又唔駛自己拆殼，蝦夠新鮮，爽口又彈牙，啲粉絲嗦哂啲汁，但又唔會太淋，加埋佢係辣辣地，好惹味，真心好味。
小炒黃牛肉
雖然我無食過費大廚，我和陳生都覺得呢個小炒黃牛肉好好食，不過陳生覺得有啲辣，但我就覺得剛剛好，撈飯食一流。
清炒油麥菜
食完兩個濃味餸，點都要叫返個菜，所以清清地炒個油麥菜。不過我略嫌多油咗少少。又有可能我哋已經飽飽哋啦。
如果平時食得比較清啖嘅人，會覺得味道好重，又多油。但本身湘菜辣味就比較豐富，所以好味道都係因人而異。
地址：湖南省长沙市开福区蔡锷北路154号中医附二对面(原江南公社)
培元橋站4號出口
黑色經典臭豆腐
本身我都好鐘意食臭豆腐，每次去台灣差唔多每晚都要食，今次去長沙仲唔食餐飽嘅！
黑色嘅臭豆腐係長沙最出名，我覺得食落又唔臭，外層好脆，中間仲加啲辣醬、辣菜脯菜，仲有香菜係好夾嘅！
臭豆腐係咪唔可以用新鮮來形容🤔因為試過幾間，都係呢間黑色經典最好味🤤
整椰椰
原粒椰子即開即飲，成個椰子殼都剝咗，可以好方便咁食椰子肉，鮮甜好味道！
長沙3日2夜之旅，真係好多嘢食，特別係鍾意食辣嘅朋友！雖然有好多嘢食，但2個人2把口，真係食唔到啲咩，飲吓嘢都已經好飽。
#長沙 #長沙美食 #自由行 #臭豆腐 #鴛央咖啡 #茶顏悅色 #咖啡 #茶 #雞尾酒 #大山咖啡 #小籠包 #大湯包 #嗦粉 #湖南菜 #湘菜 #燒肉 #整椰椰
