米遊記

Roosevelt Island▶The Oculus▶Brooklyn Bridge▶ManhattanBridge▶華爾街銅牛▶ChinaTown Dinner▶

時差仍然未轉得哂，又係凌晨5點幾起身，懶床到7點決定和三家姐落街跑步，其實三家姐Book酒店時已經睇定附近有無咩跑步路線。酒店附近有一個Roosevelt Island(羅福斯島)，我哋圍住個島跑一個圈大約6K，一邊跑一邊觀賞周圍的景色。

最先跑上Roosevelt Island Bridge(羅福斯島橋)，之後經過燈塔，呢個島上面有兩條橋，另一條橋Ed Koch Queensboro Bridge(昆斯博羅橋)連接曼哈頓與布魯克林兩地，可供單車和行人通過，最特別係有纜車，完全想像唔到橋旁邊有纜車囉⋯可能我見識少，哈哈⋯原來未有Subway前纜車係來往島的主要交通工具，呢個島細細，有船有橋有纜車，又有subway，都幾方便。

跑跑吓仲見到有鵝媽媽帶住啲鵝BB好QQ咁喺草地上面走。島上面的動物好自由自在，公園白鴿是完全唔會怕人，當你跑到好近都唔會飛走，我覺得啲白鴿比香港果啲高大，又特別肥，唔知係咪生活得開心啲呢？島上都有好多打卡位，日出日落影相都會好靚。之後我再搵返島上歷史，原來它曾經有瘋人院、監獄、天花醫院等等⋯

跑完步返到酒店Hea一陣，又要搵吓中午去邊，梳洗完換衫出去都已經約12點。首先出去食Lunch，搭Subway去到Park Place車站落車，一出站見到SaladBox，見到咩就食咩，就食Salad。我本身都幾鍾意食Salad，所以暫時去到NYC覺得Salad係最好食，不論材料、醬料都有很多選擇。

由Park Place車站行去今日去的The Oculus只需幾分鍾，位於世界貿易中心車站(PATH)，是一個大型轉車站，共有12條線，亦是一個購物商場。整個建築物風格又好特別，我覺得外型好似恐龍骨的化石，入到裡面睇整座白色建築又給我帶來視覺衝擊，雖然商場很多人，但都充滿空間感，感覺亦十分平靜，陽光照落去好似一座透光白色的三角塔。其實The Oculus是世貿中心規劃中其中一部分，由 Santiago Calatrava 設計，白色金屬包住鋼條似肋骨，以像徵一隻手放鴿子的動作向上和向外伸出，所以成為了紐約新地標。

途經過世貿遺址，再去華爾街銅牛留倩影，估唔到有咁多人排隊影相，都排咗30分鐘。

之後我哋決定行上Brooklyn Bridge(布魯克林大橋)，由曼哈頓經大橋行去布魯克林約10分鐘，不過Brooklyn Bridge是一個非常熱滿的旅遊景點，行人路兩邊都擺滿攤檔，人很多。大橋以哥德式的建築設計，令人不其然停下腳步影相留念，加上當日天氣好好，天上一舊雲都無，不過就好大風，影吓相咁就用咗了35分鐘先行完。去得Brooklyn Bridge就一定會去埋影Dumbo – Manhattan Bridge View，就好似一個套餐，兩條橋十是近又順路，是大部分遊客必到的打卡位。雖然兩條橋都在東河上面，不過藍色的橋身就好易認出Manhattan Bridge。兩條橋都可以讓行人過橋，但Manhattan Bridge不可以在橋面上行走，欣賞到的景色有限，我們只在遠處拍照。

出發之前亞女有問我哋有咩想食，我哋就話：「不如你Plan吓啦，我哋又唔熟。」最後佢就話，有韓國菜、日本菜、越南、意大利、美國等等⋯⋯」我聽完就覺得好似同香港差唔多咁，都係食世界各地的菜色。最後今晚佢約咗我哋係China Town食東南亞菜色。由York St搭Subway去ChinaTown大約20分鐘，Subway行去餐廳只需2分鐘。NYONYA餐廳人很多，排隊大約等了30分鐘。

如果大家有睇到我嘅Facebook，應該都知道當日我哋返到酒店收到個壞消息。酒店所有住客都要搬離酒店，原本要住10日嘅酒店突然要我哋搬，簡直係晴天霹靂，最終我哋拖住疲倦身軀上房搵酒店，經過三家姐多番周旋，最終都搵到酒店。