香港東坪洲 環島遊｜千層糕岩石、更樓石、斬頸洲2020.2.22
仲有D行山Post都未出哂，就急不及待出咗個 香港東坪洲 Post先。出發去香港東坪洲 要晨早流流起身，由於只有星期六、日有船，呢兩日都只有兩班船，早上9:00同下午5:15，所以要睇清楚時間出發，最好就8:30之前去到碼頭排隊買船飛，不過我果日去到都見到有D人係網上已經買咗飛，唔知係唔係D導賞團呢？如果大家容易暈船浪的話建議食定暈浪丸，船程時間都幾耐，不過我哋當日去就比較風平浪靜。入到去先發現原來東坪洲以前叫做平洲，因為香港已經有一個離島叫坪洲，所以東坪洲系香港最東北面，所以就叫佢做東坪洲啦。如果大家有興趣可以去睇下片啦。⋯⋯
前往方法：大學站→馬料水碼頭（步行約8分鐘）
船票：HKD90來回（接受八達通付款）船程：約90分鐘
由大學站B出口出，沿路都有指示牌指示馬料水碼頭方向點去，所以都唔駛太擔心搵唔到路。
我哋已經8:20去到碼頭已經有一埋人排緊隊等買飛，差唔多8:50條隊已經排到出公廁出面，以為會有人數限制，原來都準備咗兩隻船，所以入東坪洲嘅人都幾多。
喺馬料水碼頭除咗去東坪洲之外，仲可以去塔門，當日去到嘅時候，入塔門嘅人都超多，好似2-3架船陸續開出。
前面就係東坪洲嘅外貌啦，就咁睇就係一個好平同細細地嘅島
終於落船啦，落船第一句真心咁「嘩」咗出嚟，因為係香港真心未見過海水清到可以見到底架，所以係碼頭已經忍唔住要影返幾張相先
碼頭遠景
沿碼頭直行會見到一個東坪洲資訊牌，咁上面會介紹東坪洲路線啦，有咩景點同東坪洲地質概況
咁我簡單咁講吓我地當日行嘅路線，東坪洲資訊牌建議我地由
碼頭→更樓石→龍落水→斬頸洲→碼頭
因為我哋上網睇過D潮汐漲退時間，發現如果水退得唔多就睇到嘅岩石就會比較少，所以決定掉番轉行
碼頭→洲尾角→斬頸洲→龍落水→更樓石→碼頭
其實行邊一邊開始都可以，全程大約4小時就可以完成，入到島發現上船嘅人群散開之後都唔會太密集系個島上面，當然疫情其間島上面嘅人會係比平時多，但都還好，起碼比系山上面少DD
咁有幾個打卡位，其實就係路線必到地方，繼續向下睇就會見到架啦↓↓↓
長沙灣
提一提大家：島上面有3個廁所，1個就係碼頭附近，另1個係更樓石，仲有1個係長沙灣個灘中間左右
呢個沙灘D沙比較幼，有一家大細會係海邊玩水
其實沿住長沙灣走個沙灘走大約30分鐘到達洲尾角，第一個打卡位置↑↑↑
到達每一個景點前都會有一個指示牌話你知大約要幾耐先會到，洲尾角到斬頸洲我哋行咗大約20分鐘就到啦。
呢個時間海水未退得好多，所以由斬頸洲上面望落去都唔係露出好多岩石，不過落斬頸洲要小心D，因為要行一小段斜石路先會到。
東坪洲 第二個打卡位置↑↑↑
命名為斬頸洲嘅原因：島中間長期被風浪侵蝕到分開咗兩邊，由高空望落去就好似被斬斷頸咁樣
由斬頸洲行20分鐘左右到達龍落水
龍落水遠景
第三個打卡位↑↑↑
由呢個角度望落去就好似條龍脊一直伸延落海咁，因為白色似龍脊呢個位置嘅岩石比下層岩石抗蝕力高，所以下層岩石被海水侵蝕較快而形成。龍落水～我哋逗留時間最耐，呢度岩石面積廣闊，加上水退得比較遠，吹住海風坐坐吓，咁就坐咗成個鐘啦。
行到每一個打卡位都會有個資訊牌介紹，呢個只係其中一個↑↑↑
資訊牌會講解岩石形成
喺龍落水向更樓石走中間有個叫難過水，如果水退得唔夠係落唔到去D岩石上面，所以我哋都無去到。
不過經過東坪洲嘅最高點↑↑↑
其實東坪洲環島遊Keep住都係行呢D平路，唔算太難行太辛苦↑↑↑龍落水大約行25分鐘就到更樓石
更樓石
第四個打卡位↑↑↑
亞媽灣係一個石灘，沿住亞媽灣行20分鐘左右就會返到東坪洲碼頭啦
途中會經過一些舊石屋⋯⋯
全個島有兩間士多，新昌士多和坪洲士多，我哋叫咗魚蛋燒賣紅豆冰，坐到差不多5:00就離開啦
因為大部人都會係呢度食Lunch，所以落船嘅時候士多會比較多人，建議可以準備少量乾糧。
建議大家早少少去到碼頭排隊上船
香港東坪洲日落，太陽都準備落山啦
差不多7:00左右返到去馬料水碼頭，咁就完咗今日嘅東坪洲環島遊啦。
今次係我第一次去香港東坪洲，咁三家姐就係好耐嘅讀書時期去過一次，不過我都幾有驚喜，估唔到香港都有咁靚嘅地方，同埋D岩石經歷咗唔知幾千億萬年先會形成，都係一個幾特別嘅體驗，下次有機會再吓香港其他島嘅地方。
以上純粹個人感受及分享
YouTubeChannel
https://www.youtube.com/channel/UCDohi8V2YxLN220qDvRk2ZQ
