遠足記-大刀屻落山行到懷疑人生的樓梯
大刀屻
我返咗嚟香港一段時間，都去行咗幾個山，比較有感覺都係呢個「大刀屻」，話難唔難，話易又唔係好易，但對於平時無咩點行山，體能一般會有點辛苦。今次一齊行裡面有幾個人都係好少行山，所以比預計完成時間長。我地由嘉道理農場出發，粉嶺火車站離開。大刀屻山上能夠360飽覽八鄉錦田同大帽山景色。大刀屻高度566米，山脊兩邊都是懸崖，好似係刀屻上行走咁，但山上都唔算大危險。我強烈建議一定要粉嶺火車站離開，因為我地係落山時遇到啲伯伯上緊山，問佢地果邊行左幾耐，佢話4小時（當然我落山唔駛咁耐啦）仲反問我地到大刀屻未呀，所以之後我落山都落到懷疑人生。
路線：嘉道理農場 ▶ 大刀屻 ▶ 北大刀屻 ▶ 粉嶺火車站
交通：西鐵錦上路、太和或大埔墟火車站 ▶ 64K ▶ 嘉道理農場 ▶
全程：約9公里
時間：約6小時（連拍照時間）
由元朗錦上路上巴士，落車後向左手邊落樓梯就會見到行山徑牌個亭，如果由大埔太和果邊上車，落車要過對面馬路先會見到
我地11點起行，開始嘅路都係一D上落山梯級，唔太難，加上有樹陰，又唔會太曬。
今次慢走，大約行左45分鐘都未有1K，不過上山嘅路就開始係D沙石路，如果著普通嘅波鞋都會比較跣腳。
行到呢個位，兩邊都無樹陰，夏天去一定會曬到一個點，果日我去完都曬到黑咗，所以一定要做好防曬措施。
到山腰位都已經睇到八鄉錦田景色
八鄉錦田全景
後面個山先係大刀屻，遠觀大刀屻，今日山上面都唔算太多人
繼續上山嘅沙石路
上上落落
剛剛就係前面個山峰行過來
見到鐵鍊就知道差唔多到大刀屻
路唔算大窄，不過人多時要小心禮讓，因為兩邊都係懸崖
山上面都有好多大石，不過爬上去影相都要小心D
比佢影到無人嘅時候⋯⋯
仲未到大刀屻山頂架，繼續行，上上落落
望過對面就係雞公嶺（係我要行嘅List裡面）
又係一堆大石
繼續上山
行咗咁耐，終於上到大刀屻啦，高566米
今次行得好慢，2.5小時先行咗2K，自己睇到都有D擔心，因為後面仲有差唔多7K未行⋯⋯
例牌影嘅標高柱
留咗15分鐘就起行出發啦，面前繼續係沙石路
又要落山向北大刀屻出發
要好好珍惜行平路機會
因為又要上山啦
下午3點，仲有5K到粉嶺火車站
上埋呢段樓梯就到北大刀屻
由大刀屻到北大刀屻上上落落都只係落咗100米左右⋯⋯
北大刀屻高480米，由大刀屻到北大刀屻大約2.4K，行咗90分鐘，中間段路無咩打卡位，加快咗速度
離開北大刀屻就又要行樓梯落山啦
呢條分叉路行上面同下面都一樣，上面可以通往涼亭休憩處，前面有一個匯合點
下圖呢隻樓梯無限Loop，行咗差唔多30分鐘
見到石屎路唔好咁開心住，我都以為好快會到火車站，點知都行左成個鐘先到
諗住落山唔駛再上樓梯啦，點知過咗呢度就見到一條要上山嘅樓梯，咁攰又肚餓嘅情況下，大家都好想快D落山食飯
總結：大刀屻山脊上係最靚，不過中段就有D曬，過咗大刀屻之後D路有D悶，如果由粉嶺上會覺得行極都無野睇，會好懷疑自己係咪行錯山。建議帶夠水同食物，中間無任何補給，沙石路較多，要揀無咁跣嘅鞋，最好就行山鞋
以上純粹個人感受及分享
