美食 香港

東涌喜來登自助午餐|唔迫爆、悠閑、CP值高

三家姐話要補祝我生日,佢話要食餐好啲慶祝吓。今日我哋都放假唔使返工,所以喺前一晚三家姐搵咗邊度Lunch buffet 有位打電話去book!最後我地兩個帶埋阿媽一齊入東涌,去左東涌喜來登酒店食lunch buffet。呢間酒店新開左有大半年,食自助餐嘅地方叫「嶼坊」,可能因為新開嘅關係,餐廳裝修設計偏向引入自然光, 所以感覺都好光猛,可惜餐廳外面仲係地盤所以就無咩風景睇,只有少部分坐位睇到昂坪纜車同d d 海景。但如果Staycation 住得夠高就望到有機場+海景,酒店泳池都能夠睇到海。

首先睇下個甜品區先,Lunch 甜品種類都算多,雖然我唔食朱古力,但見到個巨型Tiramisu 杯都要影返張相,木糠布甸,木糠粉好乾身,唔會話放得耐結埋一舊,cream打得夠挺身,味道幾好,不過就略嫌佢木糠比例太多, 不停食木糠多啲。芒果布甸迷李杯上面個芒果醬有少少酸,其他仲有忌廉泡芙、巴利莓芝士餅、粟子蛋糕、法式焦糖燉蛋、雞蛋仔、迷你葡撻、Movenpick雪糕有6種口味添…

我覺得檸檬青檸和熱情果芒果有點偏酸,Mix 呍呢嗱食都可以,楓糖合桃入口後有一種咖啡味留咗喺口腔裡面咁,意大利奶凍就係士多啤梨味,最後就係我唔食嘅瑞士朱古力啦。

冷盤有一般酒店自助餐都有嘅三文魚, 吞拿魚魚生,壽司,風乾火腿, 幾款唔同口味嘅cheese,  同埋有沙律好似薯仔,雜菜, 牛肉沙律;海鮮方面有面包蟹,凍蝦,青口,蜆同埋翡翠螺。

魚生我覺得三文魚就一般般,凍櫃側邊 有兩款煙三文魚嘅冷盤,仲有油香,更加好味。而吞拿魚,應該係佢解凍做得唔好, 質素麻麻!

凍海鮮方面, 麵包蟹好大隻, 但可惜無肉亦都無膏, 所以食咗半隻就放棄。翡翠螺味道正常, 唔算大隻, 可惜食落比較多沙。

日式熱食有雞肉串同雞肉棒, 雞肉串我哋都覺得比較鹹。另外天婦羅蝦亦都不得不提。 唔係間間buffet有天婦羅, 有都可能炸粉硬, 亦都攤凍晒。 而今日呢間, 睇住師父即炸, 即夾返自己位, 入口時天婦羅蝦, 魚仲係熱到辣口。 粉漿亦都做得夠薄, 唔係食粉多過食餡。

仲有一口和牛漢堡, 配上新鮮,任你自己加幾多都得嘅牛油果醬都幾好味。

 

熱食都有好多種類,有一個細細地嘅燒味部,有一般嘅燒鴨,白切雞,叉燒等。 另外有中式蒸點,蘿蔔糕、蝦餃燒賣、荷葉蒸雞、XO醬炒腸粉、西芹蝦球、揚洲炒飯、香煎三文魚、燒鴨胸配扒雜菜etc….

好多Buffet 都有嘅中式麵檔,不過佢個雞湯底唔似味精都幾有雞味,食完唔會好口渴。

印度咖哩有牛油雞,酒店可能係照顧有食客人唔食辣嘅關係, 所以咖哩佢煮咗印度牛油雞,一款比較上冷門d嘅咖哩出嚟。 我反而比較欣賞。而配搭上,佢無平時見到嘅naan, 有paratha呢款比較煙韌,濕d嘅薄餅。

意式茄蓉燴珍珠麵

焗免治牛肉咖喱飯

全個buffet,  我哋幾個都一致讚好嘅就係炆牛面頰。因為夠晒火候,所以雖然大大舊肉, 但係好嫩, 亦都有牛味。

今次個LunchBuffet 都好滿足,大家有興趣都可以去試下,人又唔會好多,座得舒服又唔會人迫迫咁拎野食,可能之前去食果D Buffet 太多人有陰影。

三家姐溫馨提示:入到東涌站,其實可以通過東薈城向藍天海岸方向行路去酒店,需時20分鐘左右腳程,部分路段係露天,秋涼時間其實幾舒服。 但而家夏天,行路過去會比較熱,可以選擇搭酒店提供嘅shuttle bus,  每30分鐘一班, 又或者的士都可以。

以上純粹個人感受及分享